Ministri i Shoqërisë Informatike dhe Administratës, Admirim Aliti, që vjen nga radhët e Alternativës dega në Kumanovë, sot ka nënshkruar një Memorandum Bashkëpunimi midis MSHIA dhe Univerzitetit FON.
Ky Memorandum Bashkëpunimi midis tjerash parasheh edhe shumë lehtësime për studentët.
Në vijim kumtesa e plotë nga kabineti i ministrit Admirim Aliti:
Sot prita në një takim pune, rektoren e Universitetit Amerikan në Evropë-FON, profesoreshën Biljana Puleska Janushevska me të cilën nënshkruam një Memorandum Bashkëpunimi.
Memorandumi i bashkëpunimit midis FON dhe MSHIA midis tjerash përfshinë: Organizimin e takimeve të punës, punëtorive, konferencave dhe të ngjashme në lidhje me aktivitetet si dhe ngjarjet me qëllim të realizimit të shërbimeve sa më efikase dhe efektive për qytetarët.
U dakorduam që bashkëpunimi i kuadrit arsimor të Universitetit të përfshihet në diskutimet publike në lidhje me propozim-ligjet me qëllim të gjetjes së zgjidhjeve më të mira ligjore në pajtim me profesionalizmin e tyre.
Po ashtu u dakorduam për krijimin e kushteve më të favorshme për studimin e të punësuarve në MSHIA dhe anëtarëve të familjeve të tyre në programet studimore nga cikli i parë dhe i dytë i studimeve në Universitetin FON.
